Şeyxülislam nüfuzlu forumda iştirak edəcək

03.11.2023
 
         Qafqaz Müsəlmanları İdarəsinin sədri Şeyxülislam Allahşükür Paşazadə noyabrın 4-də Birləşmiş Ərəb Əmirliklərinə səfərə yola düşür. Səfərdən məqsəd Müsəlman Ağsaqqalları Şurası, Vatikan və Birləşmiş Millətlər Təşkilatının Ətraf Mühit Proqramı (UNEP) ilə əməkdaşlıq çərçivəsində COP 28-in (BMT İqlim Dəyişikliyi Konfransı) konfransında iştirak etməkdir. 6-7 noyabr tarixlərində Birləşmiş Ərəb Əmirliklərinin Abu Dabi şəhərində keçiriləcək konfransın mövzusu “Vicdani birlik: Planetar dirçəliş naminə dini liderlərin həmrəyliyi”dir.
         COP 28 ərəfəsində siyasi liderlərin qatıldığı bu tədbirdə iqlim böhranı və bəşəriyyətin üzləşdiyi digər qlobal problemləri müzakirə etmək üçün, ilk dəfə olaraq, dünyanın dini liderləri iştirak edəcəklər. Konfrans iqlim böhranının mənəvi baxımdan dəyərləndirilməsinə, eləcə də ümumi evimiz olan Yer planetinin qorunması, xilas edilməsi üçün müxtəlif dinlərin ortaq məsuliyyətinin nümayiş etdirilməsi məsələlərinə həsr olunmuşdur. QMİ sədri Şeyxülislam A. Paşazadə tədbirdə məruzə ilə çıxış edəcəkdir. O, öz məruzəsində 30 ilə yaxın erməni işğalı dövründə Azərbaycan ərazilərində törədilmiş ekoloji cinayətlərdən, torpaqların yandırılması, su hövzələrinin çirkləndirilməsi və digər vandalizm aktları məsələlərinə toxunacaqdır.
         COP 28-in BƏƏ sədrliyi ilə baş tutan bu tədbiri çərçivəsində Şeyxülislam A. Paşazadənin nüfuzlu dini liderlərlə görüşləri nəzərdə tutulur.
 
QMİ-nin Mətbuat Xidməti
 
 
*Materiallardan istifadə zamanı sayta istinad vacibdir!

Oxunub : 6635