20 APREL 2024
QMİ sədri Avropa Şurası rəsmisi ilə görüşdü
02.05.2022
Fransada səfərdə olan Qafqaz Müsəlmanları İdarəsinin sədri Şeyxülislam Allahşükür Paşazadə mayın 2-də Strasburq şəhərində Avropa Şurasının sədr müavini cənab Byorn Berq ilə görüşdü.
İslam dünyasının yeganə təmsilçisi qismində Avropa Şurasının «Din və sülh, din və insan hüquqları üzrə dinlərarası dialoq» mövzusunda keçirdiyi beynəlxalq konfransda iştirak və məruzə etmiş Şeyxülislam A. Paşazadəni səmimi salamlayan B. Berq müsəlmanların müqəddəs Ramazan bayramı münasibətilə Azərbaycanın və Qafqazın dini liderini təbrik etdi, belə bir xoş gündə Strasburqda olmasından məmnunluğunu bildirərək səmimi arzularını ifadə etdi.
Şeyxülislam A.Paşazadə Avropa Şurasının keçirdiyi tədbirə böyük önəm verərək qatıldığını və burada müzakirə olunan dinlərarası dialoqun dərin əhəmiyyət kəsb etməsini qeyd etdi. O bildirdi ki, dünyada sülhün və müqəddəs dəyər olan insan həyatının qorunması istiqamətində 40 ildən artıq Şeyxülislamlıq fəaliyyəti dövründə dinlərarası dialoq müstəvisinə hər zaman önəm vermiş, bu yöndə əməli səylərini, o cümlədən, beynəlxalq təşkilatlarla əməkdaşlıq zəminində səylərini əsirgəməmişdir.
Avropa Şurası təmsilçisi Şeyxülislam A. Paşazadənin fəaliyyətini yüksək qiymətləndirərək onun Qafqazda sülhün bərqərarı üçün dini liderlərlə görüşlərini dəyərləndirərək bunu dinlərarası dialoq işinə böyük töhfə kimi qeyd etmişdir. QMİ sədri sülhyaratma istiqamətində dini liderlərin görüşlərində davamlı iştirakının ən mühüm nəticəsi kimi Qafqazda münaqişənin heç bir vəchlə dini qarşıdurma müstəvisinə keçməməsini vurğulayaraq, bu istiqamətdə səyləri olduqca yüksək qiymətləndirmişdir.
Azərbaycan dövlətinin 44 günlük Vətən müharibəsində Zəfər qazanmasından sonra azad olunmuş torpaqlarımızda aparılan yenidənqurma, dini-mənəvi irsin dirçəldilməsi yönündə aparılan işlər kontekstində Şeyxülislam A. Paşazadə bir sıra mühüm məqamları AŞ Baş katibi müavininin diqqətinə çatdırmışdır. Bu əsnada, işğal dövründə İslam dini abidələrinin həqarətə uğradılması, məhv edilməsi ilə yanaşı xristian və digər dinlərə mənsub mənəvi məkanların, qəbirstanlıq və tarixi abidələrin da vandalizm qurbanı olması məsələsinə diqqəti çəkən Şeyxülislam A. Paşazadə erməni işğalçılarının dini məbədlərin, o cümlədən, xristian kilsələrinin mənşəyinin dəyişdirilməsi yönündə həyata keçirdikləri saxtalaşdırma işlərindən bəhs etdi. Şeyxülislam bildirdi ki, Azərbaycandakı dini konfessiya rəhbərləri ilə birlikdə işğaldan azad olunmuş əraziləri ilk dəfə ziyarət edərkən milli-mənəvi-dini irsimizə qarşı işğalçılar tərəfindən törədilmiş cinayətlərin miqyasını - mədəni irsə qarşı soyqırımın dəhşətlərini görmüşlər. Törətdikləri vandalizm aktlarını danan erməni tərəfinin dünya ictimaiyyətinə guya onların dini məbədlərinin dağıdılması ilə bağlı müraciətlər edərək saxta məlumatlar yaymasını yolverilməz hesab edən QMİ sədri A. Paşazadə Avropa Şurası rəsmilərini azad edilmiş torpaqlarımıza səfər etməyə dəvət edərək bütün faktları özlərinin müşahidə etməsini təklif etdi.
Azərbaycan dövlətinin multikultural həyatı dəstəkləyən siyasətindən bəhs edən QMİ sədri Şeyxülislam A. Paşazadə müxtəlif dini və milli mənsubiyyət daşıyıcısı olan vətəndaşlarımızın dövlətin diqqət və qayğısı ilə əhatə olunmasından, öz dini ibadətlərini, bayramlarını azad qeyd etmələrindən, dini məbədlərinin dövlət tərəfindən təmir-bərpa, yenilərinin inşa edilməsindən bəhs etdi. Azərbaycanda dövlət-din münasibətlərinin yüksək səviyyədə qurulmasının vacib amil olduğuna diqqəti çəkən Şeyxülislam A. Paşazadə bu müdrik siyasətin əsasının xalqımızın ümummilli lideri Heydər Əliyev tərəfindən qoyulmasını və bu gün Azərbaycan Prezidenti İlham Əliyev tərəfindən yüksək səviyyədə davam və inkişaf etdirilməsindən danışdı və bu siyasətin uğurunun təzahürü olaraq Azərbaycanda mənəvi harmoniya şəraitində yaşayan, bütün dünya üçün nümunəvi birgəyaşayış modeli olan multikultural cəmiyyətin mövcudluğunu vurğuladı. Bildirdi ki, ünyada insan həmrəyliyinə xidmət edən qlobal ideyalar irəli sürən Azərbaycan Prezidenti İlham Əliyev cənabları Multikulturalim, İslam Həmrəyliyi illərinin elan olunmasının təşəbbüskarı, Mədəniyətlərarası dialoqa dair məhşur Bakı prosesinin müəllifidir. Azərbaycanda dini konfessiya rəhbərlərinin dövlət rəhbəri ilə qardaşlıq süfrəsi — İftar mərasimlərində bir araya gəlmək kimi dəyərli ənənəsi mövcuddur.
Şeyxülislam A. Paşazadə Avropa Şurasının Strasburqda baş tutmuş konfransa, dinlərarası dialoqa dair Strasburq prinsiplərinə böyük dəyər verdi və qurum xəttilə bu prosesin davamı olaraq növbəti konfransın tolerantlıq məkanı və multikultural dəyərlər ölkəsi Azərbaycanda keçirilməsini təklif etdi. Avropa Şurasının rəsmisi cənab Byorn Berq bu təklifi müsbət qiymətləndirdi və qurumlarının gələcək konfranslarla bağlı dəyərləndirilmə prosesində bu təklifin hökmən nəzərdən keçiriləcəyini bildirdi.
QMİ-nin Mətbuat Xidməti
*Materiallardan istifadə zamanı sayta istinad vacibdir!
Oxunub : 1416
