ABŞ-ın Yuta Ştat Senatı Azərbaycan multikulturalizmini təqdir edən bəyannamə qəbul edib. (VİDEO)

 
11.03.2020
ABŞ-ın Yuta Ştat Senatı martın 9-da Azərbaycanın dinlərarası harmoniya və multikulturalizm ənənələrini təqdir edən bəyannamə qəbul edib.
 
Azərbaycanın Los-Ancelesdəki Baş Konsulluğundan verilən məlumata görə, bəyannamədə Azərbaycandakı dinlərarası tolerantlıq mühiti təsvir olunaraq, bu mühitin gücləndirilməsində Azərbaycan hökumətinin önəmli rolu vurğulanır.
Plenar iclasda qəbul edilən bəyannaməni senator Cin Deyvis oxuyub. Yuta Senatının sədri Stüart Adams Azərbaycanın dünyada dini azadlıqlara göstərdiyi hörmətə və dinlərarası tolerantlığına görə tanındığını bildirib.
 
Bəyannamənin qəbul olunduğu plenar iclasda Yuta ştatında səfərdə olan Azərbaycan nümayəndə heyəti iştirak edib. Qeyd edək ki, Azərbaycanın Los-Ancelesdəki Baş Konsulluğu, Bakı Beynəlxalq Multikulturalizm Mərkəzi (BBMM), Dini Qurumlarla İş üzrə Dövlət Komitəsi (DQİDK) və ABŞ-ın Stirlinq Fondunun birgə təşkilatçılığı ilə Azərbaycanın müxtəlif dini icmaları və dövlət qurumlarının təmsilçilərindən ibarət nümayəndə heyəti Yuta ştatında səfərdədir. Nümayəndə heyətinə Azərbaycanın Los-Ancelesdəki baş konsulu Nəsimi Ağayev, BBMM-in icraçı direktoru Rəvan Həsənov, DQİDK sədrinin müavini Gündüz İsmayılov, Mənəvi Dəyərlərin Təbliği Fondunun icraçı direktoru Mehman İsmayılov, Qafqaz Müsəlmanları İdarəsi sədrinin müavini Fuad Nurullayev, Avropa Yəhudilərinin Bakı dini icmasının sədri Aleksandr Şarovski və Rus Pravoslav Kilsəsinin Bakı və Azərbaycan Yeparxiyasının nümayəndəsi Elnur Əfəndiyev daxildir.
 
Bəyannamənin qəbulundan sonra Azərbaycanın Los-Ancelesdəki baş konsulu Nəsimi Ağayev plenar iclasda çıxış edərək ölkəmizin multikulturalizm ənənələrini yüksək dəyərləndirdiyinə görə Yuta Senatına təşəkkürünü bildirib. O, çətin bölgədə yerləşən Azərbaycanın bu gün dinlərarası harmoniya üzrə gözəl bir örnək olduğunu, ölkəmizdə müsəlman, xristian, yəhudi və digər dinlərin nümayəndələrinin qarşılıqlı hörmət və qardaşlıq şəraitində birgə yaşadıqlarını qeyd edib.
 
Səfər müddətində nümayəndə heyəti, həmçinin Yuta Ştat Senatının sədri Stüart Adams, Yuta Ştat Nümayəndələr Palatasının spikeri Bred Uilson və ştatın paytaxtı Solt Leyk Siti şəhərinin meri Erin Mendenhol ilə görüşlər keçirərək, onları Azərbaycanın qədim tolerantlıq ənənələri və multikulturalizm modeli haqqında ətraflı məlumatlandırıb.
 

Oxunub : 493